Mittwoch, 23. September 2020, Mündener Allgemeine / Lokales
De Ümmedrunk in Roathiuse
GESCHICHTEN AUF PLATT – Die Hochzeit
Wat was eck upjerejet- weii wolln an duisen Wiekenenne freijen. Niu was et sso weiit. Weii wolln ösek sso langsam mie uisen Truituijen – mein Broaer un mein Schwoger – up’n Wech moaken, domie weii bloat nich toa loate in Roathiuse ankumet.“Nix verchetten?“ froge eck meinen Mann, befur weii ösek in den chlänzenden Hochteidtswogen settet. „Nee,weii hoat alles. De Ringe sind doa un de Koarf fur’n Ümmedrunk stunt oak all in Kofferruume“ ssecht ha. Weii ssind denn oak pünktlich in Roathiuse anekum un de Standesbeamte hett ösek fründlich jechrüsset.
Niu was de Truizermonie vorbeii und weii würn jesetzlich Mann un Frue. Als de Standesbeamte un de Truituijen ösek alles Choate jewünschet harn, hett mein Mann de Inloadunge toam Ümmedrunk uitespruken. De Koarf stunt all doa, faan avjedecket mie en witten Dammastdooke. Mein Mann nümmt den Koarf, packet de Chläsere uit, gucket meck an un denn gucket ha toa mein Broaer.
Mein Broaer springet up un fix was ha wech dur de Dür. „Dat kann nich woar ssein, de Ssekt is nich in Koarf.. Dat fänget joa choat an“ denke eck. De Standesbeamte hett seck villichte jewundert, denn de Chläsere stun’n joa all up’n Dische. Ümme Teidt toa jewinn’n, hett mein Mann sseck wat mie üne ouver de choate Reede un dat historische Truizimmer in Roathiuse vertellt. Et würn kaane taan minuten verchoan, doa kamm mein Broaer mie de Ssektflaschen wier toar Dür rin. Man choat, datt me de Weinhandlunge in de Teigelstrooten kennt! Niu kunn’n weii up uise Ehechlücke drinken, de Ssekt was choat jekeult und schmeckede wunderboar.
Un als weii wier truhiuse in Hemmeln anekum ssind, stunt de Ssekt fur uise Truiunge noch in Keulschranke. Sso chaff et chleick noch en Ümmedrunk. Denn was joa oak boale Polteroabend un an nächsten Doge de kerkliche Truiunge un ne schöne Feijer mie achzich Chästen.
Joahre löter wurd eck öfter moal toam Ümmedrunk in dat Roathiuse inneloaen, ouver en Ümmedrunk in Standesamt chaff et nur aanmoal fur meck – dat was fur ouver virrzich Joahren!!
Info: Haben auch Sie eine amüsante Situation erlebt, die sie auf Platt erzählen möchten? Dann schicken Sie sie an hann.muenden@hna.de oder per Post an Mündener Allgemeine, Kirchstraße 3, 34346 Hann. Münden.